Црногорската полиција објави пет фотографии од Радоје Звицер (42), водач на Кавачкиот клан, кој се бара за шест убиства, обид за убиство и шверц со дрога. Потерниците се издадени од Црна Гора и Австрија, а се објавени по обемната полициска акција на подрачјето на Котор и Тиват, при која беа запленети пари и луксузни возила од објекти што ги користело семејството Звицер.
Црногорската Интерпол канцеларија издаде црвена потерница за Звицер, кој е меѓународно баран за седум кривични дела поврзани со криминална организација, шест убиства, обид за убиство, пет кривични дела поврзани со дрога и нелегално поседување оружје и експлозивни материи.
Австриското МВР објави дека Звицер се бара и во Виена поради шверц на 83 килограми кокаин, увезен преку неговата криминална организација. Според оперативните информации, тој се наоѓа во бегство и се сомнева дека е во странство.
Звицер е еден од водачите на Кавачкиот клан, кој со години е во конфликт со Шкаљар кланот, при што десетици лица загинаа во меѓусебните пресметки. Тој е во бегство од 2021 година, а истраги против него се водат и во Грција.
