Свети Трифун е еден од најпочитуваните светци во народната традиција, особено меѓу лозарите и земјоделците. Неговиот празник се поврзува со почетокот на пролетта, будењето на природата и надежта за плодна година.
Според преданието, Свети Трифун поседувал исцелителни дарби и станал познат откако ја излекувал принцезата Гордијана, ќерка на римскиот цар Гордиј. Таа била тешко болна, а ниту еден лекар не можел да ѝ помогне. Легендата вели дека духот што ја мачел изјавил дека може да биде истеран само од човек по име Трифун. По наредба на царот биле пронајдени сите со тоа име, но само младиот Трифун успеал да ја излекува принцезата.
Иако бил богато награден, Трифун се вратил на својот скромен живот, одгледувајќи гуски и делејќи го богатството на сиромашните.
Со доаѓањето на царот Декиј започнале нови прогони на христијаните. Трифун одбил да се откаже од својата вера, по што бил подложен на тешки мачења и на крајот погубен. Неговото тело било погребано во родното место Кампсада, а подоцна неговите мошти биле пренесени во Цариград, од каде што дел завршиле во Котор, каде што се чуваат и денес.
Во народната традиција, Свети Трифун се смета за заштитник на лозјата и лозарите. На неговиот празник, лозарите симболично закројуваат лозје и го полеваат со вино, верувајќи дека тоа ќе донесе богат род. Според верувањата, ако денот е дождлив, се очекува плодна година, а ако е сончево – сушна сезона.
Празникот на Свети Трифун во народната свест е поврзан и со љубовта, верноста и благосостојбата, а во некои краишта се празнува како ден за заштита од природни непогоди како град и поплави.
