Според последните податоци на Управа за хидрометеоролошки работи, најниската утринска температура денеска беше измерена во Берово со -4 степени, додека на Попова Шапка се измерени -2 степени. Во Крива Паланка, Претор, Битола, Струмица и Маврови Анови утринската температура изнесуваше 0 степени. Во Тетово, Прилеп, Штип и Крушево се измери 1 степен, а во Скопје-Петровец, Велес, Демир Капија и Виница 2 степени. Највисока утринска температура беше во Гевгелија со 5 степени.
Во последните 24 часа, до 7 часот утринава, се измерени 2 литра на квадратен метар врнежи во Охрид и Претор, додека снежната покривка на Попова Шапка изнесува 62 сантиметри.
Денеска времето ќе биде променливо облачно, а попладне и во текот на ноќта се очекуваат повремени врнежи од дожд. Пообилни врнежи се предвидуваат во северозападните делови на земјата, каде локално може да наврнат над 25 литри на квадратен метар. Ќе дува умерен ветер, а долж Повардарието се очекува засилен југоисточен ветер. Максималните дневни температури ќе се движат од 11 до 16 степени.
Во Скопје се очекува променливо облачно време со повремени врнежи од дожд попладне и во текот на ноќта. Ќе дува слаб до умерен југоисточен ветер, кој повремено ќе засилува во делови од котлината, а дневната температура ќе достигне до 14 степени.
