Македонец од дијаспората ќе настапи на Зимските олимписки игри како дел од канадската репрезентација. Лука Стоикос, кој има македонско потекло по татко му Борис, ќе дебитира на 25. Зимски олимписки игри во Милано-Кортина како член на тимот на Канада во боб четворосед.
Дваесет и двегодишниот Стоикос до неодамна се натпреварувал во американски фудбал, но пред осум месеци одлучил да ја промени спортската кариера и да се насочи кон боб. Неговата физичка подготвеност и експлозивноста му овозможиле брзо да стане дел од тимот, каде што ја има улогата на туркач на бобот.
Својот прв меѓународен настап го имал во ноември на трка од Светскиот куп во Лилехамер, додека веќе во декември успеал да се пласира во топ 10 со канадската селекција, што претставува значаен успех за млад спортист на почетокот на кариерата во овој спорт.
Стоикос доаѓа од семејство силно поврзано со македонската заедница во Канада. Неговите баба и дедо се долгогодишни донатори на македонската православна црква „Свети Климент Охридски“ во Торонто, а татко му Борис бил претседател на црковниот одбор. Спортската традиција во семејството е исто така изразена – неговиот татко Борис и чичко му Џон ја претставувале Канада на Игрите на Комонвелтот во 1996 година во дисциплината фрлање кладиво.
„Моето семејство и македонската заедница ми се голема поддршка во кариерата. Иако сум роден во Канада, моето македонско и италијанско потекло се нешто на кое сум горд. Настапувам за Канада, но чувствувам дека ги претставувам и македонската и италијанската заедница“, изјави Стоикос.
Натпреварите во боб четворосед на олимписките игри започнуваат на 18 февруари.
Покрај Стоикос, на овие Игри настапи уште еден спортист со македонско потекло. Хокејарката Кристин дела Ровере, родена во Канада, настапи за Италија – земјата на нејзиниот татко, и со својот тим го освои осмото место. Нејзината мајка Елизабета Димовска е познат стоматолог, додека нејзините баба и дедо се основачи и долгогодишни уредници на радио програмата „Обединета Македонија“ во Торонто.
