Унгарија и Словачка се обидуваат да најдат алтернатива за руската нафта откако Украина ги блокира испораките преку нафтоводот „Дружба“. Минатиот викенд, унгарскиот министер за надворешни работи, Петер Сијарто, потврди дека заедно со словачката министерка за економија, Дениса Сакова, испратиле писмо до хрватскиот колега Анте Јуп, со барање Хрватска да овозможи транспорт на руска нафта преку Јадранскиот нафтовод.
„Украина сѐ уште не ја обновила испораката по политички причини, и тоа создава сериозни предизвици за нашата енергетска безбедност“, рече Сијарто на својот Фејсбук-профил. Тој нагласи дека транспортот мора да се изврши согласно правилата на Европската Унија, бидејќи Унгарија и Словачка имаат исклучителни дозволи да купуваат руска нафта и покрај санкциите на ЕУ.
Министерот појасни дека, ако нафтата не може да се транспортира преку цевководот, другата опција е увоз преку морски пат. „Безбедноста на енергетското снабдување не смее да стане жртва на политички или идеолошки пресметки“, додаде тој.
Според Сијарто, Украина го блокирала снабдувањето со цел да создаде притисок врз унгарската влада пред парламентарните избори на 12 април. Од друга страна, Киев објаснува дека прекинот е резултат на руски напад врз инфраструктурата на 27 јануари.
