Германскиот автомобилски гигант BMW започна глобална акција за повлекување возила, која според извори од весникот kfz-Betrieb, би можела да опфати околу 575.000 автомобили. Компанијата не ја потврдува точната бројка, но ја опишува како „средна шестцифрена бројка“. Во Германија, пак, засегнати се 28.582 автомобили.
Причината за повлекувањето е проблем со стартерот: по голем број стартувања, магнетниот прекинувач може да се износи, што доведува до тешкотии при стартувањето на моторот, а во најлош случај, возилото воопшто да не се запали. Дополнително, не се исклучува можноста за краток спој, кој може да предизвика локално прегревање и потенцијален пожар. BMW предупредува дека сопствениците може да забележат чад или мирис на изгорено и ги советува да не го оставаат автомобилот без надзор додека моторот е вклучен.
Акцијата за повлекување ги опфаќа модели од серијата 2 Coupe, некои верзии од сериите 3, 4 и 5, 6 Gran Turismo, седаните од серијата 7, како и SUV моделите X4, X5, X6 и спортскиот Z4. Проблемот е поврзан со стартери произведени помеѓу јули 2020 и јули 2022 година, вклучувајќи и оние што подоцна биле заменети во сервиси.
Поради тоа што стартерите биле складирани различно време пред инсталација, не е возможно прецизно да се одреди периодот на производство на самите возила. Сопствениците можат да проверат дали нивниот автомобил е опфатен со повлекувањето на официјалната веб-страница на BMW, со внесување на бројот на шасијата (VIN). https://vehiclerecall.bmwgroup.com/index.html?brand=bmw&market=de&language=de
