Танкер со сирова нафта повторно го минал Ормускиот Теснец, еден од најчувствителните поморски коридори во светот, и покрај засилените тензии и новите американски ограничувања насочени кон бродови поврзани со ирански пристаништа. Според податоци за следење на бродскиот сообраќај, пловилото не се упатувало кон Иран, туку кон Ирак, што дополнително ја нагласува сложеноста на тековните рути во регионот.
Во исто време, други информации укажуваат дека морскиот сообраќај низ теснецот постепено се одвива, иако под значително зголемена неизвесност. Reuters пренесува дека најмалку два танкери под санкции, опишани како супертанкери, успеале да влезат во Персискиот Залив преку истиот премин, што практично ги оспорува првичните очекувања дека блокадата би можела целосно да ја парализира пловидбата.
Новата американска политика дојде по неуспехот на дипломатските преговори меѓу Вашингтон и Техеран, при што целта е јасно дефинирана – ограничување на иранските поморски нафтени текови. Во првите денови по воведувањето на мерките, дел од бродовите се повлекоа, а други останаа закотвени во Оманскиот Залив, чекајќи појасни сигнали за безбедно продолжување на пловидбата.
Иако последните движења на танкери укажуваат дека теснецот не е целосно блокиран, аналитичарите предупредуваат дека тоа не значи стабилизација. Наместо тоа, дел од нив го толкуваат актуелното одвивање на сообраќајот како внимателно „испитување на теренот“ и тестирање на границите на американските санкции.
Во меѓувреме, од Техеран пристигнуваат пораки дека може да се овозможи побезбеден и поорганизиран премин низ овој стратешки воден пат, но само доколку се исполнат одредени услови, што дополнително ја држи неизвесноста високо на глобалниот енергетски пазар.
…
