Утре Советот на јавни обвинители ќе ја одржи својата 38. седница, на која единствената точка на дневен ред е давање мислење до Владата за кандидатите што се во трка за ова високо обвинителско место.
Според законските процедури, Советот има рок од 15 дена да ја изнесе својата оценка, позитивна или негативна, за секој од пријавените. Доколку кандидатот добие позитивно мислење, Владата ќе го предложи до Собранието, каде што за избор е потребно мнозинство од 61 пратеник.
Во конкуренција се повеќе познати имиња од правосудниот свет. Меѓу нив се актуелната вршителка на должност државен јавен обвинител, Анита Тополова-Исајловска, обвинителките Ленче Ристовска и Лидија Раичевиќ, судијата Ненад Савевски, како и поранешниот претседател на Кривичниот суд, Владимир Панчевски.
Новото име на оваа функција ќе го наследи Љупчо Коцевски, кој во декември поднесе неотповиклива оставка, отворајќи го патот за нов лидер на Обвинителството.
