Министерството за здравство ги отфрла шпекулациите дека донесувањето на Законот за заштита од пушење ќе биде одложено. Според официјалното соопштение, финалната верзија на законот ќе биде доставена до Владата веќе следната недела.
Од министерството нагласуваат дека сите разговори за „фазна имплементација“ не подразбираат пролонгирање на стапувањето на законот во сила. Напротив, законската примена ќе следи согласно утврдените рокови. Со „фазност“ се мисли единствено на постепената примена во почетниот период: засилен надзор, информирање на јавноста и издавање на опомени, со цел институциите, угостителите и граѓаните полесно да се прилагодат на новите правила.
Главната цел останува непроменета: да се спречи започнувањето со пушење кај младите, да се создадат генерации без никотинска зависност и да се заштитат граѓаните и работниците од пасивно пушење во затворени јавни и работни простории.
Министерството уверува дека ќе продолжи отворено да комуницира со јавноста, редовно информирајќи за секој нареден чекор од процесот на имплементација. „Наша задача е да им овозможиме на сите јасни упатства и поддршка, а културата на почитување на правилата да се изгради одржливо на долг рок“, стои во соопштението.
