Судењето за трагичниот пожар во т.н. кабаре „Пулс“ во Кочани, во кој животот го загубија 63 лица, а над 200 беа повредени, е одложено поради влошена здравствена состојба на еден од обвинетите.
Како што соопшти Основниот кривичен суд Скопје, главната расправа закажана за 19 февруари нема да се одржи, бидејќи обвинетиот Гроздан Милковски се наоѓа на болничко лекување во општата болница во Кочани.
Судијката Диана Груевска-Илиевска, која претседава со судечкиот совет, остварила телефонски разговор со лекарите задолжени за лекувањето на Милковски. Тие ја информирале дека тој не е во состојба да присуствува на рочиштето, но посочиле дека неговата здравствена состојба се очекува да се подобри, што би му овозможило да присуствува на следните судења.
Милковски е сопственик на објектот во кој функционирало кабарето „Пулс“. Тој претходно изјави дека објектот го издал под кирија и дека не бил запознаен со неговата пренамена. Неговата одбрана и на претходното рочиште укажа дека обвинетиот има здравствени проблеми и тешко го следи процесот.
Од судот информираат дека, со цел економичност на постапката и избегнување дополнителни трошоци, за одложувањето се известени сите странки во постапката – бранителите, полномошниците на оштетените, сведоците, како и надлежните институции. Воедно, остануваат во сила веќе закажаните термини за продолжување на судењето.
Следното рочиште е закажано за 25 февруари, кога се очекува да сведочат петмина сведоци. На претходното рочиште беа сослушани четворица сведоци, меѓу кои пожарникари кои учествувале во гаснењето на пожарот, како и лица кои биле присутни во објектот во моментот на несреќата.
Во меѓувреме, родителите на жртвите изразија сомнежи за можен притисок врз сведоци од страна на еден од обвинетите, повикувајќи ги надлежните институции да ги проверат наводите.
За случајот „Пулс“ се обвинети 35 физички и три правни лица, меѓу кои сопственици, инспектори, поранешни функционери и лица од обезбедувањето. Сите обвинети на почетокот на процесот се изјаснија дека не се чувствуваат виновни.
