Предметот за наводните злоупотреби при јавните набавки во РЕК Битола, во кој се вмешани „Марковски компани“ и повеќе поединци, официјално се префрли во Основниот суд во Струга. Причината: сите 11 судии од Основниот суд во Битола, вклучително и претседателката Татјана Петровска, беа изземени поради претходно учество во случајот, оставајќи го судот без можност да формира совет.
Апелациониот суд во Битола одлучи дека Струга, како суд со проширена надлежност и доволен број судии, е соодветна да го преземе предметот. Од битолскиот суд најавија дека целата документација ќе биде пренесена во Струга, со што процесот конечно продолжува, но на нова локација.
Случајот потекнува од обвинение поднесено во јануари од страна на Битолското обвинителство, кое опфаќа осум физички лица и едно правно лице за тендер вреден околу 1,7 милиони евра. Обвинението тврди дека раководството на РЕК Битола го фаворизирало „Марковски компани“, овозможувајќи ѝ да биде единствен понудувач, додека плаќањата биле извршувани врз основа на доставени лажни документи.
Првообвинетиот Борче Марковски претходно му беше укинат притворот и му беше одредена гаранција од пет милиони евра, како и други мерки на претпазливост.
По објавувањето на информациите во медиумите, Судскиот совет изрази загриженост за начинот на постапување на дел од судиите во Битола, потенцирајќи можни пропусти во работењето.
