Адвокатката Ружица Николовска, членка на правната комисија на ВМРО-ДПМНЕ, во гостувањето во емисијата „24 анализа“ на Телевизија 24, остро критикуваше дел од работата на правосудството во земјата. Таа го опиша како „апсурден“ својот личен впечаток од еден конкретен случај, во кој, како што рече, поранешен пратеник се соочил со обвинение за дневници, додека обвинителот од СЈО кој го водел предметот истовремено земал бонуси.
„Имав прилика да видам предмет кој го водеше обвинител од СЈО против поранешен пратеник, заради наводно примени дневници. Истовремено, истиот обвинител добивал бонуси, за кои јавноста имаше информации, а сепак никој не сноси одговорност за тоа. Сè е толку апсурдно“, посочи Николовска. Таа нагласи дека не ја изнесува оваа забелешка од политички причини, ниту за некакви „поени“, туку исклучиво од своето лично искуство и пракса во правосудството.
