Селата Жабени и Породин во јужниот дел на Пелагонија и натаму се поплавени поради обилните врнежи. Земјоделските површини, каде што се засеани јачмен и пченица, остануваат натопени, но од Министерството за земјоделство, шумарство и водостопанство уверуваат дека моментално нема причина за загриженост.
„Водата на терените се задржа поради обилните дождови и ниската релјефна форма на јужната Пелагонија. Во моментот не се очекува сериозна штета врз посевите, но состојбата ќе се следи во наредните денови, кога повисоките дневни температури можеби ќе ја покажат вистинската слика на теренот“, велат од ПЕ на МЗШВ Битола.
Земјоделците се повикуваат да ги зајакнат своите посеви со соодветна прихрана, користејќи азотни ѓубрива или биостимулатори, за да им обезбедат подобар развој. Исто така, експертите предупредуваат на превентивна заштита против можни штетници и други ризици кои би можеле да ја нарушат есенската жетва, со цел посевите да останат здрави и родни.
