Со учество на над 500 групни и поединечни маски, детско дефиле и централна карневалска поворка, во Прилеп се одржа јубилејното издание на карневалот „Прочка 2026“. Годинава беа одбележани два значајни јубилеи – 100 години „Прилепски мечкари“ и 25 години од организираното одржување на карневалот во неговата современа форма.
Градоначалникот Дејан Проданоски изјави дека карневалот претставува важен дел од културниот идентитет на градот и дека локалната самоуправа останува посветена на негово унапредување.
– Ова не е само манифестација, туку традиција што ја негуваме со гордост. „Прилепските мечкари“ се наше нематеријално културно наследство и симбол на истрајноста и автентичноста. Сто години традиција се обврска за сите нас – истакна Проданоски, заблагодарувајќи им се на учесниците, институциите и граѓаните.
Карневалот имаше и меѓународно учество, а присутен беше и претседателот на Федерацијата на европски карневалски градови, Ларс Алгел, кој оцени дека Прилеп го зацврстува своето место на европската карневалска мапа.
Во рамки на програмата беа доделени награди за најдобрите маски. Гран при наградата ја освои „Весела фарма“ од ООУ „Добре Јованоски“. Во детската конкуренција првото место го доби „Од цветот на знаењето се раѓа медот на успехот“ од ООУ „Кочо Рацин“, а кај возрасните групни маски најдобра беше „Пепелашка на карневал“ од „Зодијак“.
Карневалските активности започнаа со изложба на рачно изработени маски, а завршија на „Чист понеделник“ со заедничка посна трпеза во манастирот „Св. Ѓоргија“ во Присад, со што традиционално беше означен почетокот на Велигденскиот пост.
