Светската заедница на Генералното собрание на Обединетите нации изрази јасна поддршка за мир во Украина, усвојувајќи резолуција иницирана од страна на Украина и 45 други земји. Во гласањето, 107 земји ја поддржаа мерката, меѓу кои речиси сите членки на Европската унија, како и Македонија. Русија се изјасни против, додека Унгарија, Србија и САД се воздржаа.
Претседателот на Украина, Володимир Зеленски, преку „X“ им се заблагодари на државите што застанаа зад Киев, објавувајќи и фотографија од гласачката табела на која се гледа распределбата на гласовите. „Ова е важен чекор кон мирот и заштита на нашите граѓани. Ќе продолжиме со интензивни дипломатски напори со нашите партнери“, истакна Зеленски.
Резолуцијата предупредува на сериозните последици од војната и ја осудува продолжената ескалација на насилство од страна на Русија врз цивили и критична инфраструктура. Таа ја нагласува потребата од почитување на суверенитетот, територијалниот интегритет и единството на Украина, вклучително и нејзините територијални води.
Во текстот се бара целосен и безусловен прекин на огнот, размена на воени заробеници и враќање на сите цивили, вклучително и деца, кои се насилно раселени или притворени.
Американските претставници се воздржаа од гласање поради одредени формулации, оценувајќи дека тие можат да го одвлечат вниманието од тековните дипломатски преговори. Заменик-амбасадорката на САД, Тами Брус, нагласи дека Соединетите држави сакаат да се фокусираат на сите можни патишта за мир. Украинската дипломатија ова го оцени како „неприфатливо“.
Генералниот секретар на ОН, Антонио Гутереш, ја повика меѓународната заедница на итен прекин на огнот, истакнувајќи дека конфликтот останува „дамка на нашата колективна совест“.
