Судскиот процес за пожарот во кабаре „Пулс“ во Кочани, во кој загинаа 63 лица, а повеќе од 200 беа повредени, денеска продолжува во судницата во Идризово. Основниот кривичен суд Скопје претходно го одложи рочиштето за 19 февруари поради здравствени причини на обвинетиот Гроздан Милковски, сопственик на објектот каде се наоѓал клубот, кој бил на болничко лекување во Кочани.
Досега во судската сала се сослушани повеќе сведоци кои биле присутни во објектот за време на пожарот. Тие опишаа хаос и паника кога пламените јазици и густиот чад ја зафатија преполната дискотека. Во нивните искази се наведува дека единствен излез бил главната врата, што резултирало со стампедо, а дека само пејачот на групата ДНК, Владимир Блажев-Панчо, ги повикал гостите да излезат надвор.
За денешното рочиште се очекува да бидат сослушани уште пет сведоци предложени од Јавното обвинителство. На претходното, кое се одржа на 5 февруари, сведочеа двајца пожарникари кои учествувале во гаснењето на пожарот и двајца гости кои биле присутни во клубот.
Гроздан Милковски, кој му го издал објектот на сопственикот на „Пулс“, Дејан Јованов-Деко, на рочиштето во декември изјави дека не знаел дека објектот ќе се адаптира во кабаре.
Родителите на загинатите, кои минатата сабота учествуваа на протестниот „Марш за ангелите“, повторно изразија незадоволство од бавниот тек на судењето. Тие истакнаа дека пред почетокот на процесот добиле уверување дека ќе има две рочишта неделно, без одложувања по непроверени оправдувања, и дека лекарските потврди ќе бидат строго контролирани.
Дополнително, родителите реагираа на информации дека еден од обвинетите, Тодор Јованов, брат на Дејан Јованов-Деко, кој е во притвор во Скопје, вршел притисок врз сведоци преку телефон. Тие повикаа надлежните да ја проверат комуникацијата и телефонските разговори.
Еленко Миланов, адвокатот кој го застапува поранешниот министер за економија Крешник Бектеши, критикуваше што судењето продолжува без Обвинителството да се произнесе за барањата на дел од адвокатите околу правната квалификација на делата на обвинетите, слични на оние за кои претходно биле гонети седуммина полициски службеници.
Вкупно 35 физички и три правни лица се обвинети за пожарот во „Пулс“, меѓу кои се сопственици, блиски лица, инспектори, поранешни министри и припадници на обезбедувачката агенција на кабарето. На почетокот на судењето сите обвинети се изјаснија дека не се виновни и ја оспорија причинско-последичната врска меѓу нивните дејствија и трагичниот исход од пожарот.
Тим од 15 јавни обвинители го застапува обвинението, а судењето ќе го води судијката Диана Груевска-Илиевска.
