Драматичен грабеж во златарница се случил на улицата Грин Лејнс во Лондон, каде група маскирани напаѓачи упаднале во продавница и со ладно оружје и алати насилно ги кршеле изложните витрини.
Според информациите објавени на социјалните мрежи, инцидентот бил снимен од безбедносни камери, а на видеото се гледа како напаѓачите за кратко време земаат накит и бегаат од местото на настанот. Во моментот на грабежот во објектот имало и купувачи, кои останале затекнати од случувањата.
Очевидци тврдат дека неколку локални жители се обиделе да реагираат и да ги оттурнат напаѓачите, по што тие побегнале. Засега нема официјални информации за повредени лица.
Од лондонската полиција сè уште нема детално соопштение за случајот, ниту потврда за уапсени осомничени. Се очекува повеќе информации по завршување на истрагата и прегледот на видеоснимките од надзорните камери.
Инцидентот повторно ја отвори дебатата за безбедноста во британската престолнина и зачестените грабежи на златарници во последните години.
