Општина Ѓорче Петров воведува нова финансиска поддршка за младите – субвенција од 10.000 денари за полагање на возачки испит од Б категорија, наменета за граѓани на возраст од 18 до 25 години. Ова е прва ваква иницијатива во општината, која има за цел да ги олесни трошоците за обука и полагање, кои често претставуваат значителен товар за семејниот буџет.
„Со оваа иницијатива сакаме да го олесниме пристапот на младите до мобилност и самостојност, но и да им помогнеме да ја зголемат својата конкурентност на пазарот на трудот“, изјави градоначалникот Александар Стојкоски.
Покрај субвенцијата за возачкиот испит, Општина Ѓорче Петров работи на проект за нова станбена населба наменета за млади семејства. Во рамки на овој проект, предвидени се мерки за олеснување на трошоците преку субвенционирање на дел од комуналните давачки, со цел младите да добијат реална можност да ја градат својата иднина во локалната заедница.
Општината нагласува дека овие конкретни политики имаат директен ефект врз секојдневниот живот на младите, нудејќи им поголема сигурност и стабилност. Деталите за условите и начинот на аплицирање ќе бидат објавени во наредниот период.
