Европската Унија јасно и недвосмислено ја поддржува Република Кипар и Обединетото Кралство по синоќешниот напад со беспилотни летала врз британската воена база во Акротири, изјави претседателката на Европската комисија, Урсула фон дер Лајен.
Во телефонски разговор со кипарскиот претседател Никос Христодулидес, фон дер Лајен беше информирана за инцидентот што се случил непосредно по полуноќ, при што беспилотни летала биле насочени кон британската база на југот на Кипар. „Иако нападот не беше насочен кон самата Република Кипар, дозволете ми да појаснам: ЕУ стои цврсто и единствено зад своите членки кога и да се соочуваат со закани“, порача претседателката на Комисијата на социјалните мрежи.
Британските вооружени сили потврдија дека рано утрово забележале „сомнителни“ дронови насочени кон базата Акротири, најголемата британска воена инсталација во источниот Медитеран. Оваа база неодамна беше зајакната со дополнителни системи за воздушна одбрана, напредни радари и ловци Ф‑35, како дел од зголемените безбедносни мерки.
Британскиот премиер Кир Стармер вчера потврди дека Велика Британија им дозволила на Соединетите Држави да користат британски воени објекти за потенцијални операции против ирански ракетни цели, но истакна дека Лондон нема да учествува во непосредни напади на територијата на Иран.
Властите на Кипар подоцна ја потврдија состојбата со нападот и соопштија дека сите безбедносни служби веднаш ги активирале протоколите, а националниот Совет за безбедност бил свикан на итен состанок. Портпаролот на кипарската влада, Константинос Летимбиотис, рече дека се преземени сите неопходни мерки.
Претседателот Христодулидес потенцираше дека Кипар не е вклучен во какви било воени операции и нема намера да учествува во нив, додека траат истрагите за природата и потеклото на нападот.
