Минималната плата во државата е зголемена и сега изнесува 26.046 денари во нето-износ, односно 38.507 денари во бруто-износ со вклучени придонеси и даноци. Ова на прес-конференција го соопшти министерот за економија, Бесар Дурмиши, по одржаната седница на Економско-социјалниот совет.
Според него, минималната плата е зголемена за 1.667 денари во нето-износ, а новата сума ќе важи за мартовската плата што ќе се исплаќа во април.
– Растот на минималната плата е резултат на системско и законско решение со кое се штити стандардот на населението, но и се води сметка за одржливоста на економијата – изјави Дурмиши.
Тој појасни дека зголемувањето се пресметува според законски утврдена формула, која предвидува усогласување на минималната плата со 50 проценти од порастот на просечната нето-плата и 50 проценти од порастот на индексот на трошоците на живот, врз основа на податоците на Државниот завод за статистика.
Според официјалните податоци, просечната бруто-плата во 2025 година во однос на 2024 година е зголемена за 9,6 проценти, додека годишната инфлација изнесува 4,1 процент, што е основата врз која е утврден и актуелниот раст на минималната плата.
