Пролетта оваа година пристигнува порано од вообичаено, и со повеќе сончеви часови од просекот. Според најновите метеоролошки анализи, март ќе биде потопол за околу еден степен во однос на триесетгодишната климатска норма, што ќе значи побрзо раздвижување на природата и подолги периоди на стабилно време.
Иако календарски сè уште сме во рана пролет, временските прилики ќе наликуваат на понапредната сезона. Се очекува доминација на суво и претежно сончево време, со врнежи што ќе се движат околу просекот или малку под него. Тоа укажува на помалку врнежливи денови, иако повремени нестабилности и краткотрајни дождови не се исклучуваат.
Особено високи температури се најавуваат во Повардарието и југоисточните делови од земјата, каде што живата во термометарот во наредните денови може да достигне и до 20 Целзиусови степени, вредности кои повеќе асоцираат на април отколку на почеток на март.
