Екипите на ЈП Комунална хигиена-Скопје во февруари интензивно работеле на одржување на чистотата во главниот град, подигнувајќи и транспортирајќи околу 11.000 тони мешан комунален отпад од домаќинствата. Во исто време, екипите интервенирале и на нелегалните депонии, отстранувајќи вкупно 2.505 кубни метри отпад, при што најмногу – 600 кубни метри – биле собрани во општината Центар.
Покрај физичкото чистење, еко-патролата на претпријатието активно се справувала и со неправилното одлагање на отпадот. Во февруари се изготвени 100 записници за прекршители, меѓу кои доминираат општините Чаир (54 записници), Карпош (18), Аеродром (11), Центар (9), Ѓорче Петров (6) и Гази Баба (2). Овие мерки имаат цел да ја зајакнат свеста кај граѓаните за правилното управување со комуналниот отпад и почитувањето на Законот за јавна чистота.
Истовремено, претпријатието продолжува со едукативни активности насочени кон најмладите. Во текот на минатиот месец, вкупно 253 ученици и 64 дечиња од градинките во општините Аеродром, Центар и Чаир учествувале во еко-предавања и работилници. На децата им било објаснувано како правилно да се селектира отпадот, како се врши рециклирањето и кои се активностите на ЈП Комунална хигиена-Скопје, а предавањата се одржувале на македонски, албански и турски јазик.
