Се појавуваат сериозни критики кон администрацијата на американскиот претседател Доналд Трамп поради, како што велат аналитичарите, хаотичниот пристап кон ескалираниот конфликт на Блискиот Исток, кој трае веќе шест дена.
Како што пренесува Политико, Стејт департментот значително ги зголемува своите напори за евакуација, испраќајќи дополнителен персонал во Атина за да им помогне на илјадници Американци кои се обидуваат да го напуштат нестабилниот Блиски Исток. Високи претставници на министерството директно ги водат овие операции, кои обично се во надлежност на конзуларните тимови, што покажува сериозноста на ситуацијата.
Истовремено, Пентагон побара дополнителни офицери за воено разузнавање во своето седиште во Тампа, Флорида. Ова е првиот јавен сигнал дека администрацијата подготвува продолжени операции против Иран, кои би можеле да траат најмалку 100 дена и да се протегнат до септември. Извори тврдат дека тоа ги открива слабите подготовки на Белата куќа за поширок конфликт, и дека командите морале итно да мобилизираат ресурси кои обично се планираат со месеци однапред.
„Она што се случи изгледаше како ад хок операција. Никој не очекуваше дека воената акција е неизбежна“, коментира Џералд Фајерштајн, поранешен американски дипломат со долгогодишно искуство на Блискиот Исток. „Се чини дека решија да започнат војна само одеднаш, во сабота наутро.“
Масовната координирана акција на САД и Израел таргетираше клучни безбедносни структури во Иран и резултираше со смртта на врховниот лидер на земјата и други високи функционери. Сепак, официјалните претставници сè уште не изнеле јасна стратегиска цел или крајна визија за операцијата.
Истовремено, администрацијата се соочува со тешкотии во оправдувањето на нападите. Иран возврати со напади кон американски и други цели низ регионот, вклучувајќи дипломатски објекти, што дополнително ги зголемува стравувањата за можен недостиг на муниција и опремa меѓу сојузниците на САД на Блискиот Исток.
