Градоначалникот на Општина Чаир, Изет Меџити, по повод 7 Март – Денот на учителот, порача дека образованието останува една од најважните основи врз кои се гради силно и развиено општество.
Тој истакна дека историјата покажува дека образованието отсекогаш било столб на кој се темелат стабилните општества, а во најтешките периоди токму училиштата и наставниците ја зачувале јазичната, културната и националната свест.
„И денес наставниците и училиштата остануваат меѓу најважните столбови на општеството и државата“, нагласи Меџити.
Тој посочи дека токму поради тоа образованието е главен приоритет за Општина Чаир. Освен инвестициите во училишна опрема, реновирање на постојните објекти и создавање лаборатории и спортски терени, во тек е изградба и на две нови современи училишта – „Митхат Фрашери“ и „Викторија“.
Според него, со изградбата на овие училишта ќе се намали пренатрупаноста во образовните установи и значително ќе се подобрат условите за учениците и наставниците.
Паралелно со образованието, општината инвестира и во спортската инфраструктура. Минатата недела беа поставени темелите на професионален базен во училиштето „7 Март“, проект вреден над еден милион евра, кој ќе овозможи нови можности за спорт и физичко образование за младите.
Во рамки на одбележувањето на Денот на учителот, беа оддадени признанија и на наставниците кои заминале во пензија, како благодарност за нивната долгогодишна посветеност и придонес во образованието.
Меџити упати честитка до сите наставници по повод празникот, нагласувајќи дека општината ќе продолжи да инвестира во образованието со цел секој наставник да има подобри услови за работа, а секој ученик можност да учи, да се развива и да ги оствари своите соништа.
