Иран уништил клучен американски радарски систем вреден околу 300 милиони долари, кој бил од суштинско значење за насочување на противракетната одбрана на САД во регионот на Персискиот Залив, објави „Блумберг“, повикувајќи се на американски претставник.
Станува збор за радарот AN/TPY-2, дел од противракетниот систем THAAD, кој бил стациониран во воздухопловната база Мувафак Салти во Јордан. Според информациите, радарот и придружната опрема биле уништени во првите денови од тековниот конфликт.
Информацијата подоцна ја потврдил американски претставник, а претходно за настанот извести и Си-Ен-Ен врз основа на комерцијални сателитски снимки.
Податоци од тинк-тенкот „Фондација за одбрана на демократиите“ покажуваат дека во Јордан биле регистрирани два ирански напада – на 28 февруари и на 3 март. Иако официјално се тврди дека нападите биле пресретнати, сателитските фотографии покажале дека радарот AN/TPY-2 и дел од опремата што ја користат американските противракетни системи сепак биле уништени.
Експертите оценуваат дека станува збор за сериозен стратешки удар за американската противракетна одбрана во регионот. Радарот е клучен за системот THAAD, кој е наменет за пресретнување балистички ракети на голема височина, на работ на атмосферата.
Со неговото уништување, дел од задачите за пресретнување на ракети ќе мора да ги преземат системите „Патриот“, за кои веќе има недостиг од ракети-пресретнувачи PAC-3.
Според податоците на Центарот за стратешки и меѓународни студии, САД во светот располагаат со само осум батерии од системот THAAD, вклучително и во Јужна Кореја и на Гуам. Секоја батерија чини околу една милијарда долари, а самиот радар вреди околу 300 милиони долари.
Една батерија THAAD ја сочинуваат околу 90 војници, шест лансирни возила со вкупно 48 ракети-пресретнувачи, радарот AN/TPY-2 и тактичка единица за контрола на огнот и комуникација. Секој пресретнувач, произведен од „Локхид Мартин“, чини приближно 13 милиони долари.
Американските и сојузничките системи за противвоздушна и противракетна одбрана во регионот во последниот период се под силен притисок поради серијата ирански напади со беспилотни летала и балистички ракети.
Поради зголемените закани, претставници на водечките одбранбени компании, меѓу кои „Локхид Мартин“ и „RTX“, неодамна се состанале во Белата куќа со претставници на Пентагон за да разговараат за забрзување на производството на вооружување.
