Уште во раните утрински часови дел од граѓаните се соочија со првите последици од најавеното поскапување на горивата. Додека Регулаторната комисија за енергетика се подготвуваше да ја соопшти најновата одлука за цените, некои превозници веќе почнале да ги пресметуваат трошоците и внимателно да располагаат со преостанатите резерви на гориво.
Во таква атмосфера, дел од граѓаните се нашле во необична ситуација. Патничка која утрово патувала од Бардовци кон Транспортниот центар раскажува дека автобусот на линијата 21 пристигнал со значително задоцнување, а возењето завршило порано од очекуваното.
Според неа, автобусот запрел во Влае, каде што возачот им соопштил на патниците дека возилото нема доволно гориво за да ја продолжи рутата, по што тие биле приморани сами да се снаоѓаат за понатамошниот превоз.
Од ЈСП, пак, велат дека немаат информации за вакви инциденти со нивните автобуси. Оттаму тврдат дека линиите денеска функционираат со обезбедено гориво, но признаваат дека ситуацијата за наредните денови е неизвесна.
