Министерката за енергетика, рударство и минерални суровини, Сања Божиновска, денеска во Солун учествуваше на министерскиот панел на настанот „Electricity, Digital and Regional Interconnectivity in South East Europe“, каде истакна дека иднината на енергетиката во регионот зависи од посилни интерконекции, модерни мрежи и дигитална трансформација на електроенергетските системи.
Божиновска посочи дека регионалната поврзаност е клучна за енергетската безбедност, стабилноста на системот и побрза интеграција на обновливите извори. Таа истакна неколку клучни проекти во кои се инвестира: интерконекцијата Битола – Елбасан со Албанија, зајакнување на исток–запад коридорот во Западен Балкан, унапредување на постојната интерконекција Битола – Мелити со Грција и подготовка на новата интерконекција Струмица – Сандански со Бугарија.
Министерката нагласи дека паралелно се инвестира и во дигитализација на мрежата, воведување на нов SCADA систем и модернизација на трансформаторските станици, зашто модерната енергетика бара паметни, флексибилни и поврзани системи.
„Западен Балкан има реална можност да ја забрза зелената и дигиталната транзиција на електроенергетскиот сектор, но тоа ќе го постигнеме само ако работиме заедно – со посилни интерконекции, координирано планирање и регионална соработка“, истакна Божиновска.
…
