Македонската поп-ѕвезда Влатко Лозаноски – Лозано синоќа во арената „Борис Трајковски“ во Скопје приреди концертна вечер која долго ќе им остане во сеќавање на сите присутни. Салата беше исполнета до последното место, а публиката уживаше во вистински музички спектакл исполнет со хитови, емоции и изненадувања.
Веднаш на почетокот вниманието го привлече сценската поставеност – специјална писта по која се движеше Лозано, додека млади балерини со внимателно осмислени кореографии ја збогатуваа атмосферата и носеа дополнителна сценска енергија. Секоја нивна точка беше внимателно осмислена и изведена од почеток до крај.
Еден од најемотивните моменти на вечерта се случи кога Лозано на сцената го донесе својот син Марко, кој има само 15 месеци. Малиот Марко зачудено гледаше во татко си и во публиката, а неговите очиња светеа додека ја следеше атмосферата околу себе. Публиката со аплауз го поздрави овој трогателен момент.
По кратката пауза концертот продолжи со низа од неговите најголеми хитови. Песните се редеа една по една без многу најави, бидејќи публиката уште по првите тактови ги препознаваше и ги пееше заедно со него, создавајќи уникатна атмосфера во салата.
На сцената му се придружија и гости. Лозано испеа дует со Александра Јанева, а по кратко пресоблекување следеше уште едно изненадување – на крајот од пистата беше поставена клавијатура и микрофон, по што тој настапи заедно со Пере од „Нокаут“, кој ја искористи можноста да го најави нивниот концерт на 9 мај.
Вечерта продолжи со уште едно гостување – на сцената се појави Мики Јовановски Џафер, кој со својот настап донесе нова музичка магија и дополнително ја воодушеви публиката.
Концертот на Лозано уште еднаш покажа дека домашната публика силно ги поддржува македонските музички изведувачи и дека ваквите настани можат да создадат атмосфера која долго ќе се памети.
ВИДЕОТО МОЖЕ ДА ГО ПОГЛЕДНЕТЕ ТУКА
