Меѓународната агенција за енергија (ИЕА) упати повик до земјите членки на Г7 за координирано пуштање на нафтените резерви со цел стабилизирање на глобалниот енергетски пазар. САД предлагаат ослободување на 300 до 400 милиони барели нафта.
Земјите членки располагаат со значителни залихи кои можат да ги ублажат евентуалните шокови: вкупните резерви надминуваат 1,24 милијарди барели во државните стратешки складишта, додека индустријата поседува дополнителни 600 милиони барели. Овие залихи би можеле да ја покријат побарувачката на земјите членки речиси еден месец.
Цената на нафтата на лондонскиот пазар веќе порасна за над 25%, достигнувајќи највисоки нивоа од средината на 2022 година. Главната загриженост на глобалните лидери е поради заканите од Иран за можна блокада на Хормушкиот теснец, низ кој поминува петтина од светската нафта и течен гас.
Министрите за финансии на Г7 истакнаа дека се подготвени да преземат сите потребни мерки за поддршка на глобалното снабдување, вклучително и активирање на стратешките резерви.
Како директна последица на глобалните превирања, Хрватска веќе воведе регулација на цените на горивата за заштита на граѓаните. Од утре, цената на евросуперот ќе биде лимитирана на 1,50 евра, додека евродизелот ќе изнесува 1,55 евра по литар.
Францускиот министер за финансии, Роланд Лескир, нагласи дека конечната одлука за ослободување на резервите сè уште не е донесена, но координацијата е клучна поради сериозните глобални последици од локалниот конфликт.
