Пазарните инспектори излегле на терен да прават вонредни контроли откако на социјалните мрежи се проширија информации дека на дел од бензинските станици не се точи гориво.
Директорот на Државниот пазарен инспекторат, Стојкоски, за Сител изјави дека во изминатите три дена биле спроведени над 270 контроли на пумпите низ целата држава.
При инспекциите било утврдено дека кај дваесетина бензински станици имало привремен недостиг на гориво. Сепак, како што посочува Стојкоски за Сител, прекинот во снабдувањето траел кратко — од еден до два часа, додека се дополнат резервоарите, по што точењето продолжувало без проблеми.
Поради тоа, инспекторите не напишале казни.
Според првиот човек на Пазарниот инспекторат, причина за привремениот недостиг била нагло зголемената побарувачка за гориво, која била и до четири пати поголема од вообичаеното.
Ова го потврди и премиерот Мицкоски.
– Забележани се такви однесувања на некои пуми во пограничните општини затоа што има голем притисок од соседните држави каде што цените на енергенсите се повеќе од 40-50% поголеми од цените кај нас… И како резултат на таквиот притисок ние имаме огромно зголемено количество на трошење нафта и нафтени деривати. Можеби поради тоа на одредени бензински пумпи дошло до недостиг на количините – вели Мицкоски.
Инаку, Регулаторната комисија денеска ги сподели новите цени на горивата, кои драстично поскапеа.
