Анкара денес соопшти дека во југоисточниот дел на земјата е поставен американски противвоздушен и противракетен систем „Патриот“ како дел од проширените безбедносни мерки на НАТО заштита. Во официјалната објава на турското Министерство за одбрана, се нагласува дека покрај домашните сили, сојузниците од НАТО ги засилиле средствата за воздушна одбрана со цел да се обезбеди неприкосновеност на националниот воздушен простор.
Според министерството, системот „Патриот“ е доставен во провинцијата Малaтја и е привремено поставен додека траат подготовките за негова целосна оперативна спремност да одговори на сите потенцијални закани.
Оваа одлука на турските власти следи по тензии со Иран, откако турскиот претседател Реџеп Таип Ердоган остро го предупреди Техеран да ги прекине „провокативните акции“ по инцидентот со балистичка ракета која навлегла во турскиот воздушен простор. Турската државна новинска агенција Анадолу го пренесе ставот на Ердоган дека станува збор за сериозна повреда на територијалниот суверенитет.
Министерството за одбрана на Турција претходно соопшти дека балистичката ракета, за која се верува дека е иранска, навлегла во турскиот воздушен простор пред да биде уништена од противвоздушните средства на НАТО кои оперираат во источниот Медитеран.
Техеран, преку портпаролот на иранското Министерство за надворешни работи Есмаил Багаеи, ги отфрли обвинувањата и го оцени инцидентот како „операција со лажно знаме“, без да го обвини конкретно ниту еден субјект.
