Министерството за финансии откри серија сериозни неправилности во работењето на финансиските друштва, со особено внимание на начинот на кој се рекламираат нивните услуги. Инспекциските проверки покажале дека некои компании нуделе кредити со наводни „0% камата“, додека во реалноста договорите со клиентите содржеле скриени или дополнителни трошоци.
Покрај тоа, надзорот открил дека дел од финансиските друштва пласирале реклами под различни брендови, без јасно да се наведе кое друштво стои зад понудата. Некои компании дури користеле повеќе веб-страници и различни називи во своите деловни простории, кои не одговарале на официјалниот назив регистриран во дозволата за работа.
Министерството веднаш им наложило на компаниите да ги отстранат сите реклами и натписи што можат да ја доведат јавноста во заблуда. Во спротивно, најавено е дека ќе бидат преземени сите достапни законски мерки за заштита на граѓаните.
Од министерството нагласуваат дека секое финансиско друштво е задолжено да го користи единствениот официјален назив од дозволата за работа и да има само една веб-страница на која јасно ќе биде идентификувано.
Законот за заштита на потрошувачите гласи дека трговската практика се смета за измамничка ако не ги обезбедува сите клучни информации кои се неопходни за потрошувачот да донесе информирана и осмислена одлука.
