Европската Унија не смее да ја запира својата политика на проширување, дури ни поради неизвесноста околу точните датуми на прием на нови членки, истакна Тонино Пицула, известувачот на Европскиот парламент за Србија. Според него, датумите треба да бидат последица на напредокот што земјите-кандидатки го постигнуваат, а не да се наметнуваат однадвор.
Во говорот пред европратениците, Пицула нагласи дека моментот за проширување е критичен. Десет земји веќе „тропаат на вратата“ на ЕУ, секоја на различен степен од пристапниот процес, а разликите меѓу нив се значајни. „Политиката на проширување е еден од приоритетите на ЕУ во овој мандат и мораме да го одржиме импулсот“, порача тој во видео споделено на социјалната мрежа X.
Тој потсети дека ЕУ не е само економска или валутна унија, туку заедница на вредности и споделување на ризици. Според Пицула, проширувањето денес носи нови предизвици, економската соработка и мирот веќе не се единствени фактори, безбедноста и зачувувањето на демократските принципи стануваат централни.
„За кредибилитетот на проширувањето, новите членки мора да бидат вистински подготвени и целосно усогласени со надворешната и одбранбената политика на ЕУ, како и со владеењето на правото. Во свет на зголемени геополитички закани, ова усогласување е поважно од кога било“, нагласи Пицула. Тој додаде дека кога земјите ќе ги исполнат овие критериуми, самите резултати ќе го диктираат времето на нивниот влез во Унијата, без потреба за произволни датуми.
