Германската влада подготвува нов закон што ќе ја ограничи флексибилноста на бензинските пумпи. Идните промени на цените на горивата ќе можат да се вршат само еднаш дневно, додека намалувањето на цените ќе остане непречено во било кое време. Ова го најави министерката за економија, Катарина Рајхе, додавајќи дека целта е да се сопре феноменот при кој цените на горивата скокнуваат драстично веднаш штом нафтата поскапи, а паѓаат многу побавно кога цената на суровата нафта опаѓа.
„Сакаме да го уништиме овој дисбаланс кој ги става возачите во неповолна положба“, рече Рајхе, потенцирајќи дека воведувањето на овој модел ќе бара измени во законот за монопол. Владата истовремено истражува и можност за доделување на поголеми овластувања на Антимонополската комисија, со цел поостра контрола на злоупотребите и појасна регулација на трошоците и цените во секторот за гориво.
Растот на цените е забележителен: од почетокот на американско-израелските напади врз Иран, особено дизелот, бележи континуиран скок веќе 12 дена. Политичарите од различни партии ја критикуваат оваа практика како „измама“ на возачите, истовремено истакнувајќи дека операторите на бензински пумпи често се најдат на линија на удар, иако не можат да влијаат на прикажаните цени, тие се одредуваат од компаниите што произведуваат нафтени деривати.
Според податоците на автомобилскиот клуб ADAC, просечното зголемување на цените на супер E10 и дизел во вторник изнесува 1,7 центи по литар, додека во некои региони цените дури бележат мало опаѓање од еден цен по литар во среда наутро, што може да биде прв знак дека трендот се менува.
Германската влада се инспирира од австрискиот модел, каде што дневното зголемување на цените е ограничено на една промена околу пладне, додека намалувањата се дозволени во секое време, со цел да се постигне поголема стабилност и заштита на потрошувачите.
