Во услови на зголемена нестабилност на глобалните енергетски пазари и состојбата со нафтените деривати на светско ниво, Владата внимателно ја следи состојбата на домашниот пазар и е во постојана координација со компаниите од секторот со цел да се обезбеди стабилно снабдување и да се избегнат ценовни шокови за граѓаните и економијата.
Во таа насока, компанијата ОКТА најави иницијатива за поддршка на пазарот, со која почнувајќи од денеска до крајот на март ќе обезбеди попуст од 2,4 денари за килограм (2 денари по литар) за дизел и бензини за трговците кои набавуваат горива од компанијата. Со ова се создава дополнителен простор дел од олеснувањето да се пренесе и кон крајните потрошувачи.
Овој потег доаѓа по обезбедувањето дополнителни количини гориво преку продуктоводот ВАРДАКС, што значително го зајакнува снабдувањето на домашниот пазар.
Министерката за енергетика, рударство и минерални суровини Сања Божиновска го поздрави овој чекор, истакнувајќи дека во период на глобална енергетска неизвесност особено е важно институциите и компаниите да делуваат координирано.
„Во време кога меѓународните енергетски пазари се под силен притисок и цените се под влијание на глобалните случувања, секоја иницијатива која може да придонесе за ублажување на притисокот врз граѓаните и бизнисите е значајна. Очекуваме и компаниите кои работат во малопродажба да го следат овој пример и попустот да се рефлектира и во цените што ги плаќаат граѓаните“, изјави министерката Божиновска.
Главнот извршен директор на ОКТА, Димитриос Пасхос, изјави:
„Како општествено одговорен снабдувач со енергија, ОКТА почнувајќи од денеска, па сè до крајот на месец март, воведува попуст од 2 денари по литар за дизел и бензини, за трговците на големо и мало кои набавуваат горива од ОКТА, со што им се овозможува оваа придобивка да ја пренесат кон крајните потрошувачи. Сепак, трговците на големо и мало остануваат целосно слободни самостојно да ги утврдуваат своите продажни цени. Оваа иницијатива ја одразува долгогодишната посветеност на ОКТА да го поддржува пазарот, домаќинствата и бизнисите во периоди на зголемени предизвици“, потенцираше Пасхос.
Министерката Божиновска нагласи дека очекува од малоподажните трговци да ја формираат и својата цена согласно попустот, со што олеснување ќе почуствуваат и граѓаните. Таа потенцираше дека државата сериозно ја следи состојбата на пазарот. Минатата недела во Владата се одржа координациски состанок со премиерот и со компаниите од секторот, на кој беше констатирано дека компаниите располагаат со обезбедени залихи и стабилен увоз на горива, што значи дека во овој момент снабдувањето на домашниот пазар е стабилно.
Сепак, како што беше истакнато на состанокот, цените на светските пазари се под притисок на глобалните настани, што претставува фактор кој влијае врз цените на горивата и во регионот.
Во таа насока, Владата внимателно ги следи движењата на пазарот и ги разгледува сите механизми што ѝ стојат на располагање за заштита на граѓаните, доколку глобалните ценовни притисоци продолжат. Меѓу можните инструменти се и корекции на даночните стапки, како намалување на ДДВ за горивата, како и прилагодување на акцизите, во зависност од движењата на светските цени.
Истовремено, пуштањето во функција и зголеменото користење на продуктоводот ВАРДАКС доаѓа во особено важен момент, бидејќи дополнително ја зајакнува сигурноста на снабдувањето со горива во земјата и придонесува за намалување на транспортните трошоци, кои досега се плаќаа за алтернативни начини на транспорт.
„Во услови на глобална енергетска неизвесност, стабилното снабдување и заштитата на стандардот на граѓаните остануваат наш приоритет. Владата ќе продолжи внимателно да ја следи состојбата и ќе преземе соодветни мерки доколку тоа биде потребно“, истакна министерката Божиновска.
…
