Градоначалникот на Општина Чаир, Изет Меџити, информира дека покрај инфраструктурните инвестиции и развојните проекти во општината, локалната власт посветува посебно внимание и на зачувувањето на природата и зголемувањето на зелените површини.
Како што посочи тој, дрвјата кои се наоѓаат на просторот каде што ќе се гради новиот кампус на Универзитетот „Мајка Тереза“ нема да бидат исечени, туку ќе бидат преместени и повторно засадени во новиот парк „Рилиндја“ во Чаир.
„Урбаниот развој треба да оди паралелно со заштитата на природата. Затоа дрвјата кои се наоѓаат на просторот на кампусот ќе бидат повторно засадени во паркот ‘Рилиндја’, каде што ќе продолжат да придонесуваат за зеленилото и квалитетот на живот во Чаир“, изјави Меџити.
Според најавите, во првата фаза ќе бидат пресадени околу 40 дрвја, а процесот ќе продолжи и во наредниот период со цел новиот парк постепено да се проширува и да се зголемуваат зелените површини во општината.
