21 возач лишен од слобода поради безобѕирно управување со моторно возило
Вчера, на целата територија на државата, полициските службеници лишија од слобода 21 возач поради безобѕирно управување со моторно возило.
Од нив, пет возачи (од Тетово, Штип, Скопје и Струмица) управувале возило под дејство на алкохол. Единаесет возачи (од Скопје, Битола, Дебар, Охрид, Гостивар, Тетово, Велес и Неготино) управувале возило без да поседуваат возачка дозвола, додека тројца возачи (од Велес, Куманово и Тетово) управувале возило и покрај тоа што имале активна забрана за управување.
Во два случаи кај возачи од Скопје и Штип било утврдено присуство на алкохол, при што едниот не поседувал возачка дозвола, додека другиот имал и активна мерка забрана за управување со моторно возило.
Во два од случаите возачите предизвикале и сообраќајни незгоди. Лицето З.Н.(46) од Штип, кај кого било констатирано 2,41 промили алкохол во крвта и кој управувал возило без возачка дозвола, како и И.С.(60) од Гостивар, кој исто така управувал возило без возачка дозвола. Двајцата удриле во паркирани возила.
Во текот на вчерашниот ден бил запрен и малолетник од Кавадарци, кој управувал возило без да поседува возачка дозвола.
Притоа, одземени се и 15 возила. По целосно документирање на случаите ќе бидат поднесени соодветни кривични пријави.
Апелираме до сите учесници во сообраќајот доследно да ги почитуваат сообраќајните правила и прописи. Управувањето возило под дејство на алкохол, без возачка дозвола или и покрај изречена забрана претставува сериозна опасност за безбедноста на сите учесници во сообраќајот. Само со одговорно однесување и почитување на правилата можеме заеднички да придонесеме за побезбедни патишта.
…
