На 72-годишна возраст почина чичко Драги, човекот кого речиси секој минувач кај Рекорд барем еднаш го сретнал покрај неговата скромна тезга. Со години беше дел од секојдневието на скопјани.
На малата тезга продаваше ситни работи: шноли, стегачи, штипки за коса, ланчиња и други мали предмети. Но она што најмногу го издвојуваше беше друштвото околу него. Речиси секогаш беше опкружен со кучиња, десетина улични миленици кои ги спасил од улица и за кои несебично се грижеше.
Живееше сам, но неговиот дом никогаш не беше празен. Го делеше просторот, храната и грижата со повеќе од десет напуштени кучиња. Колку што имаше за себе, толку имаше и за нив, без двоумење.
Болеста со текот на времето му го одзеде гласот, па разговорите со луѓето ги водеше на поинаков начин, пишувајќи кратки пораки на лист хартија. И покрај тоа, остана човек со манири и топлина, секогаш љубезен и трпелив со секој што ќе застанеше кај неговата тезга.
Пред околу три месеци граѓани и хумани луѓе покренаа апел за помош, за неговото лекување и за обезбедување храна за кучињата за кои се грижеше. Поддршката пристигна од многу страни. Минатиот месец, на својот Фејсбук профил, им се заблагодари на сите кои помогнаа и со надеж порача: „Ветувам дека од болница ќе излезам посилен“.
До последниот момент веруваше дека ќе се избори.
Денес, градот се разделува со човек кој немаше многу, но секогаш беше подготвен да го сподели и последното. Чичко Драги зад себе остава спомен за добрина, тивка човечност и големо срце, спомен кој ќе остане во сеќавањата на многу скопјани.
