Кина интензивно посредува за да се воспостави примирје во растечкиот вооружен судир меѓу Пакистан и Авганистан што трае со недели, соопшти денес кинеското Министерство за надворешни работи.
Портпаролот Лин Џијан истакна дека специјалниот пратеник на Пекинг за авганистански прашања постојано патува меѓу Кабул и Исламабад, со цел да го поттикне постигнувањето примирје. Во меѓувреме, кинеските амбасади одржуваат директна комуникација со двете страни за поддршка на дијалогот.
Министерот за надворешни работи Ванг Ји во последните денови водел телефонски разговори со своите колеги од Пакистан и Авганистан, повикувајќи ги на смиреност и воздржаност. „Кина се надева дека конфликтот ќе се смири, ќе се воспостави прекин на огнот и ќе се започне конструктивен дијалог за решавање на спорните прашања“, порача Ванг Ји.
Ескалацијата на тензиите следува по прогласувањето на „отворена војна“ од страна на Пакистан во февруари, при што пакистанските сили извршија напади длабоко на територијата на Авганистан, вклучувајќи го и главниот град Кабул. Конфликтот дополнително се заостри поради блиските односи на Кабул со Индија, долгогодишен ривал на Пакистан.
Исламабад ја обвинува авганистанската страна дека им пружа засолниште на борци од групата Техрик-е-Талибан Пакистан, додека талибанските власти ги негираат овие тврдења.
Од Пекинг гледаат на конфликтот не само како безбедносен предизвик, туку и како потенцијална закана за регионалните проекти за економска и инфраструктурна интеграција. Според пакистански извори, авганистанските сили претрпеле значителни загуби во најновата ескалација на судирите.
