Поранешниот функционер на СДСМ, Јани Макрадули, се огласи по исклучувањето на поранешниот скопски градоначалник Петре Шилегов од партијата, повикувајќи на разум, зрелост и внатрешен дијалог наместо продлабочување на поделбите.
Во својата реакција, Макрадули направи осврт на периодот од 2013 година, кога СДСМ беше во опозиција и под силен политички притисок, нагласувајќи дека тогашната борба била водена со голема мотивација, теренска работа и верба во промени.
Тој истакна дека лојалноста во политиката не значи слепо следење на одлуките, туку активна одговорност и способност да се мисли и зборува отворено.
„Лојалноста не е слепо следење. Лојалноста е одговорност – да мислиш, да кажеш и да создаваш“, порача Макрадули, алудирајќи на актуелните случувања во партијата.
Според него, тешките теми не треба да бидат повод за внатрешни поделби, туку можност за аргументиран дијалог и приближување на ставовите. Тој предупреди дека игнорирањето на проблемите може дополнително да ја ослабне партијата.
Макрадули се осврна и на концептот „Глас+“, кој го опиша како политика што треба да обединува и да се темели на вредности како слобода, еднаквост и солидарност. Според него, токму таков пристап е потребен и во актуелниот политички момент.
Тој нагласи дека политичката партија не треба да биде простор за молчење и пасивност, туку место каде луѓето активно размислуваат и придонесуваат со идеи.
Воедно, Макрадули упати критики и кон актуелната власт, оценувајќи дека државата се соочува со неизвесност и недостиг од стратегија, при што, според него, личните интереси често се ставаат пред интересите на граѓаните.
На крајот, тој повика на единство и создавање заеднички фронт за промени, потенцирајќи дека тие треба да започнат од самата партија.
