Во пресрет на најголемиот христијански празник, Велигден, поглаварот на Македонската православна црква – Охридска архиепископија, г.г Стефан, заедно со членовите на Светиот архијерејски синод, испрати силна духовна порака исполнета со надеж, вера и повик за заедништво.
Во своето велигденско обраќање, тие ја истакнуваат суштината на христијанството, воскресението на Исус Христос, како темел врз кој се гради верата и смислата на човечкото постоење. Пораката „Христос воскресе!“ не е само традиционален поздрав, туку, како што се нагласува, живо сведоштво за победата на животот над смртта и на светлината над темнината.
Синодот потсетува дека радоста од воскресението не е привилегија само за верниците, туку дар за целото човештво. Оттаму произлегува и обврската на христијаните – да ја споделуваат оваа добра вест со другите, не само со зборови, туку и преку дела исполнети со љубов, пожртвуваност и простување.
Во посланието се нагласува дека страдањата и смртта не се крај, туку премин кон вечниот живот. Преку примерот на Христос, верниците се повикуваат на смирение и духовен раст, живеејќи во согласност со евангелските вредности. Велигден, според архиепископот и синодот, е момент на лично и заедничко обновување – средба со Бога, но и со сопствената вера.
Посебен акцент се става на историското и духовното наследство на македонскиот народ. Се потсетува дека низ вековите, токму верата во воскресението била извор на сила во најтешките моменти. Таа вера ги одржала генерациите, кои и покрај страдањата, останале верни на духовните вредности и идентитетот.
Годинава, се вели во пораката, носи и значајни јубилеи што ја зацврстуваат колективната меморија. Се одбележуваат повеќе од еден милениум од дејноста на Свети Климент Охридски и неговата улога во утврдувањето на духовниот и просветниот живот, како и значајни историски настани како Разловечкото востание и донесувањето на првиот устав на современата македонска држава.
Овие годишнини, според црковните лидери, не се само потсетник на минатото, туку и повик за одговорност, да се зачува и надградува наследството што го оставиле предците.
Во духот на празникот, пораката завршува со повик до сите верници да ја пренесат велигденската радост и светлина, негувајќи братска љубов и заедништво, без разлика каде се наоѓаат.
Христос воскресна – Навистина воскресна!
