Триесет и осмото издание на Саем на книга 2026 ќе се одржи од 23 до 29 април во Арена Борис Трајковски, под слоганот „Отвори прозорец кон нови светови“.
Во текот на седумте саемски денови, посетителите ќе имаат можност да изберат од богата понуда на книги од домашни и странски автори, да присуствуваат на промоции на нови изданија, како и да се запознаат поблиску со издавачите и нивните наслови.
Организаторите најавуваат разновидна и динамична програма која ќе опфати книжевни промоции, работилници, средби со автори, дискусии и панели. Љубителите на книгата ќе можат да ги сретнат своите омилени писатели, но и да ја збогатат личната библиотека со нови изданија, искористувајќи ги саемските попусти.
Посебно внимание ќе биде посветено на најмладите, за кои се предвидени раскажувачки сесии и интерактивни содржини, додека повозрасната публика ќе може да учествува во разговори со реномирани автори. Акцентот оваа година е ставен на литературата што ги обединува традиционалните вредности и ја афирмира книгата како вечен извор на знаење и инспирација.
Оваа манифестација е прогласена за проект од национален интерес во областа на културата, под покровителство на Министерство за култура и туризам.
Вратите ќе бидат отворени секој ден од 10:00 до 20:00 часот. Цената на редовна влезница изнесува 100 денари, за организирани ученички посети 50 денари по ученик, додека билет за три посети чини 250 денари. Влезот е бесплатен за деца до 12 години во придружба на родител. Со секоја купена редовна влезница, дел од средствата ќе бидат донирани за СОС Детско село.
