Берлин е на самиот врв на европската листа на потрошувачи на кокаин, кетамин и канабис, открива најновата студија објавена на 18 март 2026 година, што фрла светло на сериозни социјални предизвици во градот кој се смета за центар на либерални вредности. Истражувањето, спроведено во 115 градови од 25 земји, покажува дека потрошувачката на кокаин се зголемила за 22% годинава, а употребата на кетамин бележи скок од 41% во споредба со минатата година.
По долгогодишно отсуство од европските анкети, Германската престолнина се врати во истражувањето и веднаш се најде меѓу највисоките рангирани градови. Податоците откриваат дека кокаинот не е резервиран само за викендот, неговата употреба се шири преку целата недела, што укажува на неговата интеграција во секојдневниот живот на многумина жители. Кетаминот, кој некогаш беше познат како седатив за животни, сега е трет најчесто користен стимуланс во Европа, веднаш зад Амстердам и Бристол, додека канабисот го зазема четвртото место на континентот.
Оваа динамика не се појави преку ноќ. Критичарите тврдат дека локалните власти долго време ја потценувале состојбата и избегнувале учество во европските мерења за да не испливаат проблемите на површина. Наместо да воведат поостри мерки за превенција и контрола, во 2024 година законски го регулираа канабисот, потег што, според некои експерти, уште повеќе ја нормализираше неговата употреба. Додека младите и дел од ноќната култура се потопени во употреба на дроги, политичари и дел од струката го оправдуваат тоа како дел од „урбаната“ реалност и демографските карактеристики на градот.
