Градоначалникот на Битола, Тони Коњановски, и секретарот на Општината, Борче Димитровски, учествуваат на 35. Меѓународна конференција на градоначалници во Тел Авив, Израел. Конференцијата е посветена на темата „Оспособување на градовите на иднината“, со акцент на современите технологии и вештачката интелигенција.
Според информациите од Општина Битола, посетата се реализира од 8 до 12 ноември, а на конференцијата учествуваат 22 градоначалници од 18 држави на пет континенти.
Програмата опфаќа презентации и посети на компании и инфраструктурни објекти, преку кои учесниците се запознаваат со можностите за примена на технологијата во управувањето со градовите.
Меѓу претставените решенија се платформи за мобилност, заштита на јавните податоци и клучните услуги, како и алатки што им помагаат на локалните власти да ги собираат мислењата на граѓаните и да ги користат при носењето одлуки. Дел од сесиите се посветени и на образованието, иновациите и младинското претприемништво.
Учесниците посетиле и постројка за претворање морска вода во свежа вода, каде што биле претставени искуства за иновативна инфраструктура и долгорочна сигурност на водоснабдувањето.
Во рамките на посетата, делегациите оствариле средба со израелскиот претседател Исак Херцог, на која се разговарало за лидерството, заедницата и меѓународниот дијалог. Битолската делегација имала средби и со градоначалници на неколку израелски општини.
Програмата вклучувала и посета на Светскиот центар за сеќавање на Холокаустот и на спомен-местото на загинатите во нападите од 7 октомври.
…
