Изјавите на американскиот претседател Доналд Трамп и државниот секретар Марк Рубио за можноста САД да се повлечат од мировните преговори за Украина предизвикаа реакции во западните политички и медиумски кругови, со оцени дека таков чекор може значително да го промени текот на дипломатските напори.
Според „Њујорк тајмс“, овие пораки од Вашингтон во Москва се гледаат како директна корист за Русија и претседателот Владимир Путин. Весникот посочува дека не е јасно дали станува збор за тактички притисок или за сигнал за навистинско напуштање на активната улога на САД во преговарачкиот процес.
„Што и да мислел државниот секретар, неговите зборови беа последен подарок на Америка за г-дин Путин“, наведува весникот, потсетувајќи дека од инаугурацијата на Трамп, бројните потези и изјави на администрацијата често се толкуваат како чекори во корист на Москва.
Во меѓувреме, Русија испрати сигнали за подготвеност за економска соработка со САД. Кирил Дмитриев, шеф на Рускиот фонд за директни инвестиции, објави дека одржал состанок со американската работна група Москва-Вашингтон за економска соработка, со цел да се разгледаат потенцијални проекти за обновување на билатералните односи и стабилизирање на глобалниот енергетски пазар.
Мировните преговори за Украина се во застој, дополнително оптоварени од тензиите на Блискиот Исток. Во Киев расте загриженоста дека фокусот на Вашингтон би можел да се префрли кон Иран, оставајќи ја Украина на втор план на американската надворешна политика.
Некои аналитичари оценуваат дека желбата на Трамп за подобрување на односите со Москва е дел од поширока геополитичка стратегија, која во вакви глобално сложени услови може да има далекусежни последици за исходот на украинската криза и за меѓународниот баланс на моќ.
