Во прилепската Општа болница „Борка Талески“, во рамки на Школата за трудници при гинеколошкото одделение, се одржа настан посветен на практикување на Таи Чи и медитација, со цел унапредување на здравјето и благосостојбата на идните мајки.
Настанот беше организиран по повод 21 март – Светскиот ден на Таи Чи, под мотото „Спокојни почетоци“, а во организацијата учествуваа УНФПА, Амбасадата на Народна Република Кина во Скопје и Македонската асоцијација на гинеколози и опстетичари, во соработка со прилепската болница.
Според надлежните, Школата за трудници функционира речиси една година и е бесплатна за сите учеснички. Во неа се одржуваат теоретски предавања и практични вежби еднаш неделно, а моментално во програмата учествуваат десет трудници кои ќе продолжат со практикување на Таи Чи.
Лекарите нагласуваат дека ваквите активности, заедно со јога и физикална терапија, придонесуваат за подобро физичко и ментално здравје на мајките, како и за полесна подготовка за породување.
Од кинеската амбасада истакнаа дека Таи Чи е симбол на хармонија меѓу телото и умот и дека повеќе од 400 милиони луѓе во светот ја практикуваат оваа древна техника.
Настанот има за цел не само промоција на здрави навики, туку и продлабочување на соработката меѓу Македонија и Кина, особено меѓу збратимените градови Прилеп и Дејанг.
Инаку, од почетокот на годинава во прилепската болница се родени околу 90 новороденчиња, што дополнително ја нагласува важноста од ваквите програми за поддршка на мајчиното здравје.
