Централното градско подрачје во Гостивар е разубавено со велигденски декорации во пресрет на големиот православен празник Христовото воскресение.
Во просторот околу Црква Успение на Пресвета Богородица се поставени празнични украсни елементи, меѓу кои симболични црвени јајца, светлосни инсталации и други декорации кои ја нагласуваат велигденската атмосфера во градот.
Од Општина Гостивар истакнуваат дека украсувањето на центарот во пресрет на верските празници е практика што започна минатата година и има за цел да прерасне во традиција. Покрај Велигден, градското јадро беше украсено и за муслиманскиот празник Рамазан, со што се испраќа порака за почитување на различностите и заедништво меѓу граѓаните од различни вероисповеди.
Во меѓувреме, за православните верници е во тек Страдалната седмица. Денеска е Велики четврток, утре се одбележува Велики петок, а во сабота Велика сабота. На полноќ во храмовите свечено се прославува Христовото воскресение, како симбол на победата на животот над смртта.
