Градоначалникот на Општина Тетово, Билал Касами, јавно ја изнесе идејата дека наплатата на водоводните сметки треба да се довери на приватна фирма. Според него, моменталниот модел каде долговите се предаваат на извршители не е одржлив, особено во време на избори, кога неплаќачите би можеле да гласаат против актуелната власт. Тој ја образложи својата позиција на јавната расправа за физибилити студијата изработена од Градежен факултет, која нуди решенија за хроничните проблеми со водоснабдувањето во градот.
„Нашата администрација нема капацитет да ги собира долговите како што треба. Стануваме политички објекти, и за време на кампањи никој нема да се нафати да ги принуди граѓаните да платат. Ако се обидеме, ќе нè критикуваат дека ги даваме на извршители. Решението е воведување приватен партнер,“ изјави Касами.
Податоците на општината се алармантни: од 10 милиони кубици вода што годишно поминуваат низ системот, фактурирани се само 3 милиони, а од тие, најмногу 60% се и наплатуваат. Мрежата е стара и редовно има дефекти, оставувајќи го градот без вода за пиење, а општината нема средства за модернизација.
Физибилити студијата предлага целосна интервенција: инсталирање водомери, контрола на потрошувачката, редовно фактурирање и инкасирање на сметките, со помош на приватен партнер.
Сепак, граѓанските иницијативи се противат на ова решение. „За секој проблем се наоѓа решениe со поскапување на услугите. Вода е основно право, а не луксуз,“ изјави Елмедина Абдулахи од иницијативата „За подобро Тетово“. Таа предупредува дека давање на водата во приватни раце може да значи дека граѓаните ќе плаќаат повеќе, без разлика дали го заслужуваат тоа.
Правните експерти, исто така, го предупредуваат градот за законските ризици. Виктор Стојановски, магистер по граѓанско право, истакнува дека јавните услуги мора да третираат сите граѓани еднакво и дека водата како јавен ресурс не смее да се приватизира. „Обврска на секој јавен партнер е да обезбеди еднаков третман и да ги наплаќа сите според потрошената вода. Водата мора да остане јавен ресурс,“ нагласи Стојановски.
