Стабилноста на денарот и довербата на граѓаните во домашниот банкарски систем остануваат силни, истакна гувернерот на Народната банка, д-р Трајко Славески, во разговор за емисијата „Тема на денот“ на Сител телевизија.
„Секое краткотрајно потресување предизвикано од неизвесност се надминува брзо, а депозитите дури бележат раст. Ова јасно ја покажува довербата на граѓаните во нашите банки“, истакна Славески. Според него, банкарскиот систем е стабилен и отпорен, со високо ниво на капитал и ликвидност. Адекватноста на капиталот изнесува околу 19%, што обезбедува солидна заштита во време на неизвесност.
Гувернерот се осврна и на ризиците поврзани со инфлацијата, кои главно доаѓаат од нестабилните цени на енергентите и нарушувањата во глобалните синџири на снабдување. Народната банка, нагласи тој, внимателно ги следи случувањата и е подготвена да интервенира со сите расположливи инструменти за одржување на стабилноста.
Дополнителна сигурност на економијата обезбедуваат и девизните резерви, кои на крајот на февруари достигнаа над 5,5 милијарди евра – ниво значително повисоко од 70% во однос на периодот пред пандемијата, обезбедувајќи силна поддршка за стабилноста на девизниот курс.
Што се однесува до вицегувернерите, процесот се одвива согласно законските процедури. Гувернерот предложи двајца високо искусни професионалци: госпоѓата Ана Митреска, со долгогодишно искуство во монетарна политика и истражување, и господинот Игор Величковски, експерт за платни системи и интеграција во регионални и европски структури. Славески нагласи дека нивниот избор ќе овозможи континуитет и дополнителна стабилност во работата на Народната банка.
