Премиерот Христијан Мицкоски најави дека Владата постојано ја следи ситуацијата со цените на нафтата и е подготвена да преземе дополнителни мерки доколку растот продолжи по завршувањето на тековната интервенција.
Во моментов, како што истакна Мицкоски, на сила е краткорочна двонеделна мерка која го намалува ДДВ-то на горивата од 18 на 10 проценти, што директно влијае врз цените на пумпите. „Ќе ја следиме состојбата и понатаму и, ако растот на цените продолжи, следниот чекор ќе биде намалување на акцизите и маржите, односно трошоците за складирање и транспорт“, рече премиерот по отворањето на новата трафостаница „ТС Централна“ во Скопје. Тој посочи дека вакви директни интервенции преку државниот буџет, како намалувањето на ДДВ-то, ретко се среќаваат во Европа.
На прашање за растот на платите, Мицкоски оцени дека последните податоци од Државниот завод за статистика покажуваат позитивен тренд, кој е охрабрувачки, но сè уште недоволен. „Секогаш е добро кога платите растат, вклучително и во јануари. Дали тоа е доволно? Не, секогаш треба повеќе. Наш приоритет е да ги намалиме трошоците за живот и инфлацијата, и истовремено да ги зголемиме примањата на вработените“, потенцираше премиерот.
Во врска со можниот пораст на цените на храната, тој информираше дека 30 теренски тимови од Државниот пазарен инспекторат активно ја следат ситуацијата. „Сите трошоци се анализираат, а врз основа на тоа се формираат стратегии и политики. Таму каде што ќе утврдиме непазарно однесување, Владата ќе интервенира“, додаде Мицкоски, истакнувајќи дека засилениот надзор на институциите ќе продолжи со цел да се спречат злоупотреби и неоправдан пораст на цените.
